أبي ، بابا ، يا أبّا ح إذاعة صفاقس

10 خواطر الزّمن الجميل 10 أبين بابا ، يا أبّا 10 ح إذاعة صفاقس

 أحبّتنا، قرّاء  و متابعي الزمن الجميل أهلا بكم في حلقة ( نصّية ) عدد18  من كلمة حلوّة و التي أذيعت اليوم  الأحد 16 مارس 2014 على أمواج إذاعة صفاقس بالجمهورية التونسيّة ، خلال برنامج صباح النّور للإذاعية الأنيقة فاطمة مقني ... 

-*- ملحوظة : كلّ من أشكل عليه فهم ما ورد في النّصّ من اللّهجة التونسيّة ، فضلا مراسلتنا على أنموذج الرسائل الموجود ببوّابة المدونة ~~~  شكرا 
~~~~~

--------------

مستمعينا و مستمعاتنا أهلا بيكم في موعد جديد مع كلمة حلوّة و اللّي غايتها إسعادكم و لفت انتباهكم لجماليات الحياة ،، و فيها نلامسوا بعض تفاصيل حوايج نعايشوها  يوميّا لكن يمكن ما نعطيوهاش من اهتمامنا ،، و اليوما باش نتناولوا موضوع الأب و وضعو في العايلة التونسيّة ....

كلمة أبي ، بابا، بويا و إلاّ ...يا أبّا  ،،، و غيرها من نوع ها الكلمات هي ترنيمات حلوّة و جميلة تشبّه  ياسر نوتات و أحْرف السلّم الموسيقي ،، كلمة بابا ، كلمة سحريّة تفتح الأبوا ب المسكّرة و تليّن القلوب المتحجّرة و تسيّل دموع العطف و  الحِنّية ...

كلمة بابا تعني برشا جماليّات ..، بابا ... هو المثل الأعلى ، بابا هو عنوان الرّجوليّة و الشّهامة ، عنوان الإعتزاز بالأصل ، عنوان العطف و الحبّ .....و زادة عنوان الأمان و الإحساس بالإنتماء ...

قبلْ ...- و معناها أيّام الزّمن الجميل - كان لكلمة بابا وقعها و تأثيرها و معناها ،،،

البابا أو البو ،،مثلا،،كان لمّا يصير وقت رجوعو  للدّار ،، كانت الدّار الكلّ تستنّاه بالدّقيقة و الدّرج ،، تستنّاه في شوق و محبّة ...و زادة في رهْبة كبيرة ،،،

 إيه نعم رهبة لكن حلوّة ،،، كان كيف البو يدخل الدّار ، كلّ حاجة في الدّار تشدّ بلاصتها ، الصغير و الكبير ، الأنثى و الذكر ،، كلّ واحد يشدّ بلاصتو ........حتّى من حوايج الدّار و أثاثها يتسنتر و يركح !!

رهبة... موش خوف ! و اللّي ما فهمهاش يسأل جيل السّتينات و السّبعينات ...

البو كان مصدر إعتزاز و فخرة ، كان عندو قدرْ كيف الجبل سواء حاضر أو غايب ، وقدروا يبدا من عند الأمّ و يرضعوه صغارها مع الحليب ، من غير تنظيرات و فلسفات و من غير حقوقيّات و موائد حوار ..

لكـــــــــن ما نشوفوه هالأيّام هو قلّة وجود كلمة بابا ، و انحسارها مقابل تغوّل كلمة ماما .. الماما اللّي و لاّت حاضرة برشا في محيط الصّغير ،، و حياة الصّغير تقريبا الماما مهيمنة على كلّ حاجة و كلّ لحظة ،،،و البابا ما بقى منّو في أحسن الحالات كان أنّو موصّلاتي أو تاكسيست يوصّل و يرجّع و إلاّ ( داب ) متاع فلوس ... طبعا هذا صار نتيجة  ظروف و تحوّلات داخل الأسر و العايلات الفتيّة و هذا ما يهمّناش ...لا في أصل الموضوع و لا في نتايجو و ماهوش مبحث كلامنا ،،

إذا قلنا كلمة البابا بدات تقلّ و تضيع عند  صغيّراتنا ،، ماما قالت ، ماما وصّاتني ، ماما ماتحبّش ،، نخاف من ماما ،،، حتّى نشاور ماما ، ،،

لكــــن الغريب أنّ هذه الماما و لطبيعة صبغة الأمومة الليّنة فيها مع كثرة مشاغلها و بطول الزّمان ...يجيها نهار و يكبروا الصّغيّرات تتنوّع و تتكاثر مشاكلهم و ما عادش تنجّمهم ،، وقتها تستنجد بْبُوهم اللّي هو غالبا  ماهواش حاضر و ما هواش في نفس الموجة لكن من اللّززْ يتدخّل و يكون تدخّلو غالبا من غير تقدير سليم للموقف و ربّما يوصل حتّى لبعضْ التهوّر ..

و وقتها يحدث المحظور و تتعمّق المشاكل و يصير العنادْ والجنوح وحتّى.... اللّطف ساعات  العقوق من هاك الصّغيّرات اللّي هوما في الحقيقة ضحايا هاك الإختلال في التوازن التربوي و غياب تقاسم الأدوار ....

قلتلكم في أوّل حديثي أنّ البو قبل على أيّام طفولتنا كان فاعل في العايلة و قدرو كبير ، و يقابلو من جيهة ثانية شحنات العطف و الحنان اللي تعطيها الأمّ مع اللّهوة و المتابعة لصغيّراتها ،،،

هكّا عشنا و تربّينا ،  وهكّا طلعنا  أجيال متعلمة أحسن تعليم   ومتربّية أحسن  تربية ، و أقلّ عٌقد في ها الحياة ،...نقدّروا والدينا و نحبّوهم برشا و زادة نجلّوا آباءنا ...

و هاكا علاش همسة نسوقوها للأمّهات الفضليات باش يخلّيوا بلاصة لوظيفة الآباء و يعطيوا الهيبة و القدرْ للبو  على خاطر هذا فيه انعكاس إيجابي لخلق  توازن في شخصيّة الصّغيرات ..و هكّا صغيّراتنا  يتربّاو في محيط يساعد على نموّ متوازن تربويّا ، عاطفيا و نفسيّا ....

و همسة ثانية نقولوافيها  للآباء  أنّو لازم باش يتحمّلوا مسؤولياتهم و لازم باش يكونو حاضرين  مع صغيّراتهم بالجسم و العقل و العاطفة حتّى تكون عندهم بصمتهم في العايلة ....

و بهذا تزداد المحبّة و الالفة بين افراد العايلة و صغيراتنا يحقّلهم باش يغنّيوا :  يطوّل عمرك يا ميمة يا حنينة    و تعيش يا بابا و تنوّر علينا ...

ربّي يصلح حالنا و حال ذرّيتنا .

 منجي بــــــــــــــــاكير 

*