كيف نحتفل بمولد رسول الله ، حلقة إذاعيّة 11

مواكبة لحلول ذكرى المولد النّبوي الشريف 12 ربيع الأنور 1435 يسعد الزّمن الجميل أن تنقل محبّيها و متابعيها الحلقة الإذاعية (11 ) بعنوان مولد الهدى ، التي بُثّت على أمواج إذاعة صفاقس في – كلمة حلوّة – لمنجي باكير مع برنامج صباح النّور للإذاعيّة الرّاقية فاطمة مقني ...

---

صباح النّور و الهناء أختي فاطمة و كلّ المستمعين

---

للّي ما يعرفش و للّي ما ردّش بالو نقولوا  له أنّ نهار الخميس الفارط 02 جانفي هلّ علينا هلال ..عندو معزّة خاصّة عند الأمّة الإسلاميّة ، هلال شهر ربيع الأوّل أو كيف ما يُطلق عليه  ربيع الأنور ، شهر يحمل معاه ذكرى مولد الهدى ، مولد الرّسول الأعظم صلوات ربّي و سلامه عليه ،،و ها الذكرى إن شاء الله ،،،، - ذكرى المولد- باش تكون  غُدْوة : الإثنين 13 جانفي . ذكرى مولد سيّد الخلق و معلّم الإنسانيّة و مُخرجها من الظلمات إلى النّور و من عبادة العباد إلى عبادة ربّ العباد ، محمّد عبد الله و سوله اللّي أدّبه ربّه فأحسن تأديبه ، و شهد له ربّ العزّة من فوق سبع سماوات أنّه على خُلق عظيم ، الرّسول اللّي بْنى المدرسة المحمّديّة فكان منها أبوبكر و عمر و عثمان و علي و غيرهم ممّن آمنوا ،،فحسُن إيمانهم و أخلصوا أمرهم لله و اتّبعوا الرسول فأحبّهم الله و فتحْ بيهم مشارق الأرض و مغاربها و ملّكهم عروش السلاطين و جْعلْهم أئمّة ...على خاطرقدّموا مُراد الله على مرادهم ،،،و اعتزّوا بْدينهم ...و ما خافوا وما طمْعوا الاّ في اللّي خلقهم و هاكا عْلاشْ بناوْا حضارة سادتْ العالم قرونْ ، حضارة علم و أدبْ و صناعة ...حضارة كان فيها المسلمين هوما اللّي يقودوا العالم موشْ تابعين ...و إلاّ مرهونين في قراراتهم.. و مصيرهم ،،،كيما حال الأمّة الإسلاميّة

اليوم ضيّعت دينها.... و ضاعت عليها دُنياها ...

إذا قلنا المولد إن شاء الله نهار الإثنين ، و من جماليّات المسلم أنّو يتجاوز الإحتفال في ها الذكرى الجميلة بتحضير العصايد و الزقوقو ،،بل  يلزمو   يرتقي أكثر  ليحتفل بيه :

بمراجعة لذاتو ،،، يقيس روح على سنّة الحبيب  ، إنْدرا هو قريب منها و إلاّ بعيد ؟ كيف كيف يخلّص نفسو من عادات و سلوكات ما هيّاش من سنة الرّسول ،

يعْمل على إحياء و تفعيل ْ و نشْر  السّنّة  ...كيما نشرها الرّسول بنفسو ، اللّي كان المربّي و المعلّم ...و الدّاعية بالكلمة الطيّبة  و البسمة و الموعظة الحسنة ،،،، زادة المسلم اللّي يحب رسول الله و يحبّ يحتفل بمولدو يلزمو يطالع و يقرا سيرة محمّد باش يزيد يتعرّف على شخص الرّسول و تصرّفاتو و سلوكاتو ،، و يتقرّب من سيرة رسول الله باش يطبّق منها ما استطاع و يبتعد عمّا نهى عنّو ...

المولد مناسبة ،،علاش ما نجعلوش منها مناسبة  فارقة في حياتنا ، نطهّروا أنفسنا و انّحيّوا عادات وتقاليد توارثناها من غير من نفكّروا فيها و يمكن زدنا عليها كيما طالعتنا الأخبار أنّ تونس تستعدّ باش تدخل كتاب غينس بأكبر قصعة متاع عصيدة !! اللّه ، اللّه ... الناس تدخل هالموسوعة باختراع و إلاّ باكتشاف جديد و إلاّ بحاجة مفيدة و أحنا ما لقينا كان باب العصايد،،، باش ندخلوا عصر الإنفتاح و نولّيوا فرجة للسوّاح ... لا يا سادة محمّد  يحبّ أمّتو متحرّرة شادّة دينها الصّحيح من غير عادات بالية تْضيّع.. و تبعّد على جوهر و حقيقة الدين ، أمّة تحبّ و تسعى للمعرفة و العلم والعمل و تعتزّ بعبادتها لله وحده باش يعزّها ...

هكّـــــــــــــا نرضيوا رسول الله و نعبّروا على حبّنا ليه و نتقرّبوا إلى الله و نعطيوا حسن الإنطباع للآخر على دين الإسلام و على رسولنا الأعظم  وزادة ناخذوا بلاصتنا بين الأمم الرّاقية ، ونعملوا لأنفسنا مكان تحت الشّمس .

صلّى الله عليك و سلّم يا نور الهدى و بدر الدُّجى

و على آلك الأطهار و صحبك الأبرار

ربّي يهدينا و يصلح حالنا .

كلّ عام و الأمّة الإسلاميّة أرقى و أنقى و إلى اللّه أقرب

 ** ملحوظة : للّذي أشكل عليه فهم لفظ أو معنى للّهجة ، رجاء مراسلتنا على نموذج الإتّصال الموجود في الصفحة الرئيسيّة للموقع // تقديري

**أيضا

حلقة إذاعيّة 2 - وقل ربّ ارحمهما كما ربّياني صغيرا

حلقة إذاعيّة 3 - الجار للجـــار رحمة