التوازن و الإعتدال ح إذاعية 33 إذاعة صفاقس

10 حلقة إذاعية 33 إذاعة صفاقس 10 حلقة إذاعية 33 إذاعة صفاقس   10 حلقة إذاعية 33 إذاعة صفاقس10 حلقة إذاعية 33

مستمعينا ، مستمعاتنا ،،، صباح النّور و الهناء ،،، أهلا بيكم في موعد جديد من كلمة حلوّة ،،، و كلمة اليوم باش تكون في موضوع :

التوازن و الإعتدال

من جملة النعم اللّي عطاها ربي سبحانو للإنسان ، أنّو خلقو ،أي  خلق ابن آدم كائن متطوّر ، معناها كائن موش مستقرّ  و الحياة اللي سخّرهالو و الكون زادة موش مستقرّين ..علاش ؟ على خاطر الإستقرار في بلاصة وحدة و على حالة واحدة معناها الجمود ...و الجمود  في السنن الحياتيّة  و الكونيّة ما يوصّل كان للإنقراض و الإندثار ...

و ها التطوّراو التغيّر  في ذاتو هو حركة محكومة ..ما بين زوز أضداد ، بين زوز أقطاب ،  و لهذا نلقاوْ مثلا .... حار و بارد ...، حلو ومرّ ، ...خير و شرّ، سلبي و إيجابي ، يمين و يسار  ،  حياة و موت   ،،، و غيرها ،،،

و باش تستمرّ هالحركة اللي تمثّل التطوّر ..لازم الإنسان يوفّق بين هالأضداد اللي حكينا عليهم ،، و معناها أنّو يخلق و يوجد بيناتهم توازن . أيْ  يعادل بيناتهم  ،، و هكّا يمكن للإنسان أنّو  يعيش في أكثر راحة... و أكثر هناء و أكثر سعادة ..، و هكّا زادة يكون التطوّر متاعو في اتّجاه صحيح ،، فاعل و إيجابي  مثمر ...

باش تقولوا لي آش بيك بديت  تتفلسف علينا ع الصّباح ،،، لا موش فلسفة ، لكن هو تقديم لازم لمصطلح وكلمة توازن ..و يقابلها كلمة  إعتدال ، التوازن  او الاعتدال هو سرّ النجاح ، سرّ الرقيّ ، سرّ الهناء و السعادة ، و اللي هو زادة ... للاسف الحاجة  اللي تنقص برشا ناس منّا ،،، و هاكا علاش يلزمنا نعرفوا ، نعرفوا أنّ :  

- التوازن  مطلوب في المادّيات ، التوازن مطلوب في الروح .. و العاطفة و التوازن مطلوب في الفكر و التفكير ،،و بالتالي هو مطلوب في المواقف و التصرّفات و السلوكات....... وبالتالي  مطلوب في القرارات ...

-و كيف ما قلنا ، التوازن قليل عندنا  ..مثلا في الأمور المادّية   ،،، ، برشا ناس فينا و خصوصا الشّباب يا يحبّوا خدم في العلالي و شهريّة باهية ، خدمة قريبة و ماذابيهم  حتّى ترسيم من قبل ما يباشروا اذا لزم ،،، و إلاّ  ....يشدّوا القهاوي ، يخيّطوا الشوارع و يفصّلوا الزّنق و يبقاوا عبء على والديهم ،، معناها يا تعطيوني قايد يا نبقى بطّال ..

- التوازن للأسف موش موجود عندنا  زادة في عواطفنا ، أحنا قوم نحبّ بقوّة و نكره بقوّة ....و هاكا علاش كان حبّينا نعيشوا المشاكل و النّكد...... و ننساوا  المحبّة و العشرة و المعروف ....و كان كرهنا زادة تكثر مشاكلنا و همومنا ...  معناها كان صبّت اندبي و كــان  صحاتْ إندبي ...

- التوازن غايب عندنا في الرّوح ،،، أحنا ناس يا نتلهّاو بالمادّة و الجري ع الدّنيا ...حتّى تموت شعلة الروح فينا ...و تنعدم الرقّة و الرومنسيّة  و نولّيوا أجلاف شايحين باهتين ،،،،، يا ننساوا واجباتنا الدنياوية و نحترفوا الغرام و الهيام    و نولّيوا نغنّيوا  ع الأطلال... و إلاّ نقعدوا  نحلموا بالمدينة الفاضلة و الحقّ المطلق و العدل المنشود ... حتّي يفوتنا الترينو ...

- التوازن زادة ما نلقاوهش عند برشا ناس .. في الفكر ، في طريقة  التفكير و إعمال العقل ..  سواء في الحياة الخاصّة أو في الحياة الإجتماعيّة و إلاّ حتّى في الحياة السياسيّة ،،،

تلقى منّا  مثلا ...آشكون   إمّا يكون منطوي على نفسو ، سلبي ،،،، مخّو ما يخدمش حتّى يصدّد ...و يحطّ فيه كنتولة ....و إلاّ ...يولّي ميحي مع الأرياح ،،، ،،، و إلاّ تلقى فينا بالمقابل آشكون يشيّطلها و يكبّر الطّرح و ما يفكّر كان تفكير نخبوي أو متطرّف ... و يولّي ما يفهم كان  هوّ و ما يعرف كان هوّ ....و يعمل فيها أنا بوكم يا لوْلاد ،

----------

طبعا هذا غالط ، و ما يبنيش لحياة أفضل ..و يفرّق و مايجمعش ،،،

و اللي يتفحّص مليح مظاهر الحياة و سنن الكون يشوف أنّ بقاءها و صلاحها هو في سرّ التواز و الإعتدال ...

مثلا ،،  كي نشوفوا حتّى في الخلق ، فالكون خلقو ربّي سبحانو في توازن ، و من آيات   قانون التوازن الإلاهي ، قوله جلّ و علا ( لا الشمس ينبغي لها أن تدرك القمر ، و لا الليل سابق النهار ،و كلّ في فلك يسبحون ) فالمجرّات فيها توازن و تناسق عجيب يحيّر الأذهان و يذهل العقول – و هو سرّ بقاء و استمراية ها الكون... تبارك الله أحسن الخالقين .

**

حاصل القول : التوازن معيار جمالي.. و الإعتدال يثمر آليّا    الرضاء الذّاتي .و ينشر المحبّة ، يدفع نحو الايجابية ،،،، و التوازن قيمة حضاريّة.. تجمع و تحضّ على الإقبال على الحياة و بالتالي تسهّل  التعاون الجماعي  و تساعد ع النّجاح  ، و من هنا جاءت أهمّية التوازن و الإعتدال في كلّ مجالات الحياة ....

مستمعينا نهاركم طيّب ....و يصلح حالكم و بالكم 

*

ملاحظة  / كلّ من أشكل عليه فهم ما ورد في النّصّ من اللّهجة التونسيّة

 فضلا مراسلتنا 

على أنموذج الرسائل الموجود ببوّابة المدونة ~~~  شكرا 

منجي بــــاكير 10 منجي بــــاكير 10 منجي بــــاكير 10 منجي بــــاكير 

*