شوق و ذوق ح إذاعة صفاقس 24 Radio Sfax

أعزّائي متابعي و متابعات (( الزمن الجميل )) أهلا و سهلا بكم في حلقة **-  24  -** ( نصيّة ) جديدة من كلمة حلوّة ، التي أذيعت عبر أمواج أثير إذاعة صفاقس للجمهوريّة التونسيّة يوم الأحد 19 أكتوبر 2014 في برنامج صباح النور لصاحبته الإعلاميّة فاطمة مقني قادري

~~~~~

شوق و ذوق

~~~~~~

-*- إشارة: كلّ من أشكل عليه فهم ما ورد في النّصّ من اللّهجة التونسيّة ، فضلا مراسلتنا على أنموذج الرسائل الموجود ببوّابة المدونة ~~~  شكرا 

~~~

مستمعينا و متابعينا ، صباح الخيرات ، و يجعل نهاركم بهجة و رضاء و محبّة

كي العادة تجمعنا بيكم حلقة جديدة من (كلمة حلوّة ) اللّي نتمنّى أنّكم حبيتوها كيما يظهر في بعض التفاعلات اللّي تلقّيناها ،،، كلمة اليوم باش يكون موضوعها:

شوق و ذوق

الشّوق :هي لفظة باهية تدلّ على الحنين و التمنّي لْحصُول حاجة باهية ...يمكن ما عادش موجودة برشا ، لْحاجة فقدناها و نسيناها أو من حياتنا نحّيناها .............. و لهذا تلقى النّفس القويمة و السّمحة... ديما عينها لفتة لهاكْ الحاجة الباهية .

تتمنّى و تحبّ أنّها ترجع باش تزيّن حياتها ...

أمّا الذّوق : فهي لفظة زادة حلوّة ، تدلّ على الرقيّ و ...ع الفْيانة... و ع الجمال ،،، يقولّك مثلا  فلان صاحب ذوق أو ذوّاق و معناها أنّو فينو ياسر ، قويم الإحساس... يقيس بميزان الجمال في كلّ حاجة يقولها ، يعملها أو يقوم بيها ..

و الذوّاق أو الذوّاقة تلقى الناس الكلّ ترتاحلهم و تحبّهم و ما تملّش من لقاءاتهم على خاطر هوما عنوان من عناوين الجمال و البهاء اللّي تبهجنا و تفرّحنا ...

و احنا اليوما باش نستعرضوا مع بْعضنا باقة مشكّلة من الأشواق و الأذواق .

- شوْق : شوق إلى أنّا إنّحيوا الأنانيّة من حياتنا ،، نبعّدوا الحسابات الخاصّة في تعاملاتنا مع غيرنا ، و نتحلاّوا بسلوك إجتماعي نظيف و قويم و سليم ...شوق باش نحبّوا للغير ما نحبّوا لينا و نكرهولهم ما نكرهوا لينا ...

- ذوْق : ذوق وقت اللّي نحترموا الذّوق العامّ و العُرْف الجاري  و نبعدوا على النّشاز في المظهر ،،، في الهندام ،،،، في السلوك و في لغة التخاطب مع من نتعاملوا ...و نحكيوا بلغة حلوّة ...

- شوق : شوق إلى أن نبادروا بالتحيّة و السّلام النّاس اللي نعرفوهم و اللّي ما نعرفوهمش ، وشوق زادة إلى بسمة تزيّن وجوهنا و تسبق كلّ تواصل مع النّاس.

- ذوق : ذوق وقت اللّي تسعى باش تثقّف وذنك و تربّيها على اللّحن الجميل و الكلمة الطيّبة و تبعد على الصّخب و الكلام الرديء و اللّي يطرّش الأسماع  ..

- شوق : شوق إلى أنّنا نحترموا ميثاق الطبيعة ...و نحافظوا على المساحات الخضراء و علاش لا ... نزيدوا منها و كلّ قدير و قدرو .

- ذوق : ذوق عندما تسنّس لسانك على القول الباهي و الجواب الحسن .

و تقابل السّيئة بالحسنة و ما تحاولش تْكافي بالمثل ..

- شوق : شوق إلى أنّنا نعترفوا حقيقة و بالممارسة... بحقّ الآخر في التعايش معانا و إبداء الرأي في كنف الإحترام و المحبّة مهما خالفنا ...

- ذوق : ذوق أنّك ما تلقيش الفضلات الخاصّة بيك و الأوساخ قدّام دار جارك و لا في الطريق و لا في الفضاءات العموميّة ، وذوق أنّك ما تقلّقش جيرانك و ما تزعجهمش بضوضاءك ...

- شوق : شوق باش نرجعواإلى قيمنا الإسلاميّة ، و نستحضروا  سيرة حبيبنا و قدوتنا  محمّد صلّى الله عليه و سلّم  و شوق أنّا نعتزّوا  بتاريخنا الإسلامي  و نجتهدوا  باش نعلّموه لصغيّراتنا و نربيوْهم عليه ...

- ذوق : ذوق كيف ناخذوا بخاطر كبارنا و نتواضعولْهم و نحدّثوهم بما يفهموا مهما كانت درجة ثقافتنا و تعليمنا و مهما كانت شهاداتنا أو وظائفنا ..

شوق: شوق إ لى رجوع الكود لاروتْ لكيّاساتنا  و شوق إلى أن يفهم أكثريّة مستعملي الطريق عندنا أنّ مستوى سياقتهم صارت تاعبة ياسر و تعّبت معاها برشا سوّاق آخرين ..

ذوق : ذوق أنّك تحاول تخلق للنّاس اللّي تتعامل معاهم أعذار.... و تكون متسامح و ما تسبّقش النوايا الفاسدة و تعمل فيها بطلْ باش تسترجع حقّك أو كرامتك ..

****

و باش نختم نحبّ نقول أنّو اللّي يشوف الدّنيا بعين عاقلة ،، يشوف أنّ هالدّنيا مهما طال بقاء الإنسان فيها.... و مهما طال عمرو في الآخريجي نهار و يودّعها ،،، يودّعها و ما يبقى منّو كان فعلو ،، و يا سعد من كان عرضو نظيف و فعلو باهي ،،، و هاكا علاش يلزم العاقل فينا يتعلّم و يعتبر باش يجتهد في فعل الأحسن و الأفضل ،،

و يلزم زاده يعوّد نفسو أن تكون أيّامو مزيّنة  ،،، مزيّنة بالإحترام ، مزيّنة بالإنسانيّة ، مزيّنة بالإحسان و بكثير من الجماليّات   سواءْ في أقوالو و أفعالو أوفي تصرّفاتو و سلوكاتو  ...و يجتهد باش  ديما يتحلّى  في محيطو بالأخلاق الحميدة و يزرعْ الكلمة الحلوّة ...

**

مستمعينا و مستمعاتنا .....  بكلّ ذوق نهديلكم أشواقي 

منجي باكير 

*