صورةكاريكاتورية للتونسي اليوم ح.إذاعيّة 12

صورةكاريكاتورية للتونسي اليوم ح.إذاعيّة 12

يسعد الزّمن الجميل أن تنقل محبّيها و متابعيها الحلقة الإذاعية (12 ) بعنوان صورةكاريكاتورية للتونسي اليوم ، التي بُثّت على أمواج إذاعة صفاقس في – كلمة حلوّة – لمنجي باكير مع برنامج صباح النّور للإذاعيّة الرّاقية فاطمة مقني اليوم الأحد 19 جانفي
2014 ...

صباح الخير و الهناء  ….. ليك أختي فاطمة و المستمعين

من الثّابت قطعاأنّ الشّعب التونسي ، شعب كريم ، طيّب و بحْبوح ،،، لكن بالمقابل زادة أنّ ها الشّعب عندو خاصّيات ينفرد بيها و تكوّن شخصيتو المميّزة ، و هنا باش نحكيوا على  الشّخصيّة التونسيّة النّمطيّة .. يعني الشّخصيّة ال(تّيبيك ) ،،،

غالبا التونسي عندو شخصيّة مركّبة ، فسيفساء في المشاعر، التفكير و السّلوكات.

أوّلا  التّونسي ينجّم فيسع ينسى ، شعب نسّايْ و هاكا علاش التونسي ساهل باش يتنقّل من حال إلى حال من غير مراحل وبلا صعوبة ......كيف ما مثلا ، يتنقّل من الحزن للفرْح و إلاّ العكس.... بسهولة و بلاش تأثيرات جانبيّة ،،،

التّونسي زاده متقلّب الأحوال – و باقتناع مزمن – مثلا  كيف يحضر في حزن يعطيه كارو   وْ ما لازمو ، و كي تجي المهرجانات و الأعراس و الرّبوخات يقولّك أنا ليها و يولّي طيّارة متاع جوّ و شطيح ورديح ...

تجيه في الكورة تلقاه أكبر  عرّيف و محلّل رياضي وطني و إلا حتّى عالمي و أكبر المحلّلين ما يحكيش معاه ...

نفس التونسي دوّرلو ع السّياسة يولّي محلّل سياسي ما يتقطّعش ، و يقولّك ع البسباس و من زرعو ....، لا  وْ واثق من كلامو ويزيد  يعطيك نظرة استشرافيّة للأحداث السّياسيّة كان حبّيت ...

هو نفسو التونسي ...تحكي معاه ع الدّين يولّي التقوى تشعّ من عينيه ، و يظهّرْلك اللّي هو خبير في الشريعة و القرآن و السنّة و ما يوقّفوا كان النّص ....على خاطر ما يحفظوش ،وقتها يجيبلك طرف الآية و الاّ يقولك فيما معناه و يتعدّى ،أما في الفتاوي فهُو ..ساهل ياسر باش ينقلب إلى موسوعة ...، يحلّل ويحرّم ويفتي.... كي تسمعو حتّى الإمام مالك ما يقولش بيه ...

نجيوا توّا إلى عالم المال و الأعمال و الأفاريات ،،،في ها الباب التونسي يتميّز بحاجتين : الأوّلى  ،،، خلّينا نقولو عندو انفصام في الشّخصيّة الإقتصاديّة و الثّانية  هو بنفسو يتسمّى – المعجزة الإقتصاديّة –

 أمّا الأوّلى عندو انفصام على خاطر ظاهرا ...في القهاوي  و الشّارع و خصوصا في الإعلام   تسمع كان التجويح ، ما ثماش فلوس و الأسعار نار و الشهرية شويّا ،، لكن مع أوّل مناسبة تلقا أكثر النّاس شادّة الصفوف و عاملة الحضُبْ ...على العلوش أو ع الزقوقو و الدّجاج ...و إلا حتّى ع المنكرات ،،،و يزيد غرامو و يهبط العسل كيف يسمع بحاجة مفقودة ،،،

أمّا أنّو معجزة إقتصاديّة  فالتونسي بشهريّة 500 د مثلا يصرف بيها ما قيمتو مليون و خمسمائة ،،و يخلف على القروض بأنواعها و أشكالها ..

إيه نعم التونسي معجزة إقتصاديّة  ..، تحبّوا تعرفوا علاش ، أيا سيدي إسمعوا: العام فيه قدّاش من مناسبة : العيد الأول و الثاني ، دخول المدرسة ، الريفيّون وبعّد  المولد ، الأعراس والمهرجانات و النّجاحات  و زيد معاهم  الصّيف و الخلاعة ،،،    طبعا مع المصروف اليومي + فاتورات الماء و الضو و التاليفون و الفينيات و غيرو ،،،،

هاذم الكلّ التونسي يعانيهم و يكمبص ليهم و في الآخر يعدّيهم و يسلّكها ثمّ يفسّخ و يعاود من جديد ،،، بذمّتكم ثمّاشي شعب آخر ينجّم ها المعادلة الشّايكة و الميسّيون أنبوسّيبل ...؟

نزيدكم من الشِّعر بيت ، التونسي و البَـنْي ،... خصوصا في الأحياء الشّعبيّة ، تلقاه ياخو دار من الكنال و تعرفوا نار الكنال ، طبعا ياخذها بالقروض ،، ما يعدّي 4 و إلاّ 5 سنين إلاّ و يبدا في تكركير السّيمان و الياجور و تبدا الحيوط طالعة ، يسكّرها من الجيهات الكلّ حتّى يقطع الضوّ و الهواء ،،  يبني الطابق الأوّل ، يزيد يكحّلها و يركّب شويا بيبان و يطلع يسكن فيها و يكتب على الأولى (( للكراء ) )،، باش يخلّص كريدياتو.... و يكمّل باقي  حياتو غالبا هكّا بين الأحمر و الأكحل..

 و كي يجي الصّيف و تسخن فيه الدّنيا يهبط يتعشّى و يتبرّد هو و المدامة تحت بوطو الضوّ متا ع البلديّة ،،، يعني يسكّرها يقعد تحتها ،،،...

حاصيلو التونسي أعجوبة زمانو و يؤمن يا سر بالمثل اللّي يقول(( كيما يجيك الوقت إيجاه ))---- و الحقيقة الظروف هي اللّي خلاّتو يكمبص و يقلب و يخترع ، موش يقولوا الحاجة أمّ الإختراع ؟؟

***

ختاما نقولو ربّي يفتحها و يعاون كلّ من يحبّ يحسّن وضعو و يحبّ الخيرو الأمان و الإزدهار  لها البلاد ...

** كلّ من أشكل عليه فهم لفظ أو معنى من اللّهجة التونسيّة ، فضلا مراسلتنا على أنموذج الرسائل بالموقع ،،، شكرا

zaman-jamil.blogspot.com