السبت، 17 يناير، 2015

وصفة رائعة ليوم أفضل و حياة أرقى ح إذاعية 34

   متابعي و أحباب كليمة حلوّة أهلا و سهلا بيكم ،، بمناسبة آخر لقاء يجمعنا بيكم في ها الموعد الصّباحي مع أختنا فاطمة في صباح النّور ،، حبّينا باش نكرموكم و نهديولكم ((ريسات))  نهديولكم وصفة .....، وصفة موش متاع ماكلة ، لكن وصفة متاع ...غذاء للروح ، ها الوصفة رايعة و مجرّبة و زادة مكوّناتها في مقدور كلّ واحد منّا يسعى للأفضل و يحب يرتقي بنفسو .... موش لازم تاخذوا ورقة و قلم على خاطر اللّي من القلب يمشي طول للقلب ،،، و أنتوما أحبابي بإذن الله قلوبكم طيّبة و ما تحبّ كان الخير ... وصفتنا  ، إسمها وصفة ليوم أفضل و أرقى ، و باش وصفتنا يكون عندها نصيب من النّجاح و الفلاح ليك و لْشكون تتعامل معاهم  ،،، لازم باش: - تاخو مكيالين من الصّبر ،، نعرف اللي هوّ قليل شويّا لكن بالتعوّد يتوجِدْ - تحطّ معاهم فنجان طّيبة ..، قد ما الفنجان يكون أكبرقد ما  يكون خير - 4 مغارف عزيمة و إصرار - زيد قرصة من الأمل - معاهم تضيف دوزة و إلاّ اثنين من الصّدق ،،،، من المستحسن يكون ها الصّدق  مخلّط بمحبّة الآخر - قبضة من طول النّفسْ - باكو من الحذر لازم و أساسي ، لكن ماذابيك أوريجين موش مقلّد و إلاّ مغشوش - ما ننساوش رشّة ولوصغيّرة من العواطف راهي تفوّح وتعطي نكهة طيّبة ،، و اللي يغفلوا عليها و إلاّ يهمّلوها برشا ناس ... - تحضّر كوكتال من الإنسانيّة ، حسن الظنّ و التفاؤل ....و تزيدهم الكل مع الخلطة السّابقة ... - ننصحكم باش.... تستبعدوا الشكّ ، الكراهيّة ، التشاؤم و الحسد على خاطر هاذوما بزارات طعمتهم خايبة ،،،  يخلّفوا برشا آثار جانبيّة و يأثّروا تأثير سلبي على الوصفة .... -  أخيرا نجيوا للوعاء اللي باش يحتوي ها الخلطة البنينة ،، الوعاء الأصلح و اللي يزيد الوصفة نجاح و فلاح هو الإخلاص و الإحتساب ،، الإخلاص في أعمالكم لله وحدو من غير رياء و لا نفاق ، و إحتساب الأجر على الله ،  من عندو دون سواه ...و من غير ما تستنّاوْا جزاء و لا شكورا من خلقو ... و قبلْ ما نكمّل سامحوني ثمّة زوز ملاحظات  نقوللكم عليهم : الملاحظة الأولى : اللّي يحبّ و يقدر يزيد يزيّن الوصفة بشويّة عفو و شويّة فضل و إحسان ،،، طبعا هذا يزيد يحلّي المذاق و يعطيها رونق و نكهة خير للحياة الملاحظة الثانية : قد ما تجتهدوا باش تطبّقوا الوصفة هاذي قد ما تزيدوا تحبّوها و تحسّوا بأريحيّة ، إقبال أفضل ع الحياة و تزيد محبّة النّاس ليكم و هاكا علاش ننصحوا باش تكون تحضيرها بشكل يومي ..... مستمعينا مستمعاتنا ، جعلني الله و إيّاكم ممّن يستمعون القول فيتّبعون أحسنه و دمتم في حفظ الله و رعايته .  ***  مثلما عوّدتمونا ،، إذا أشكل عليكم لفظ من اللهجة التونسيّة ، راسلونا على أنموذج الرسائل الموجود في الصفحة الرئيسيّة للتوضيح و التدليل ... شكرا    منجي باكير

وصفة ليوم أفضل و حياة أرقى

متابعي و أحباب كليمة حلوّة أهلا و سهلا بيكم ،، بمناسبة اللقاء القبل الأخير اللّي  يجمعنا بيكم في ها الموعد الصّباحي مع أختنا فاطمة في صباح النّور ،، حبّينا باش نكرموكم و نهديولكم ((ريسات))  نهديولكم وصفة .....، وصفة موش متاع ماكلة ، لكن وصفة متاع ...غذاء للروح ، ها الوصفة رايعة و مجرّبة و زادة مكوّناتها في مقدور كلّ واحد منّا يسعى للأفضل و يحب يرتقي بنفسو ....

موش لازم تاخذوا ورقة و قلم ...على خاطر اللّي من القلب يمشي طول للقلب ،،، و أنتوما أحبابي ....بإذن الله قلوبكم طيّبة ، منوّرة  و ما تحبّ كان الخير ...

وصفتنا  ، إسمها وصفة ليوم أفضل و حياة أرقى ، و باش وصفتنا يكون عندها نصيب من النّجاح و الفلاح ..ليك و لْشكون تتعامل معاهم  ،،، لازم باش:
تعرف  بالباهي أنّ الفورمة اللّي باش تخدم عليها هي الإبتسامة ، الإبتسامة قدّ ما تكون أعرض تكون أحلى و خير و قد ما تكون أكثر عمقْ تكون ذات فاعليّة أكبر ...

* تبدا ..تاخو مكيالين من الصّبر ،، نعرف اللي هوّ قليل شويّا لكن بالتعوّد يتوجِدْ

* تحطّ معاهم فنجان طيبة ..، أيضا قد ما  يكون الفنجان أكبر قد ما  يكون خير

* 4 مغارف عزيمة و إصرار

* زيد قرصة من الأمل ..مخروجة بشويّة ثقة في النّفس 

*معاهم ...تضيف دوزة و إلاّ اثنين من الصّدق ،،،،

من المستحسن يكون ها الصّدق  مخلّط بمحبّة الآخر

* قبضة من الرّضا و إذا ما عندكش عوّضها  براحة البال

* باكو من الحذر لازم و أساسي ، لكن ماذابيك أوريجين موش مقلّد و إلاّ مغشوش

* ما ننساوش رشّة ولوصغيّرة من العواطف ...راهي تفوّح وتعطي نكهة طيّبة ،، و اللي للأسف ...يغفلوا عليها و إلاّ يهمّلوها برشا ناس ...

* تزيد ..تحضّر كوكتال ....من الإنسانيّة ، حسن الظنّ و التفاؤل ....و تزيدهم الكل مع الخلطة السّابقة ...

*لكـــــن ،، ننصحكم باش.... تستبعدوا الشكّ ، الكراهيّة ، التشاؤم و الحسد على خاطر هاذوما بزارات طعمتهم خايبة ،،،  يخلّفوا برشا آثار جانبيّة و يأثّروا تأثير سلبي على الوصفة ....

* أخيرا نجيوا للوعاء ، الوعاء اللي باش يحْوي  ها الخلطة البنينة ،، من غير شكّ الوعاء الأصلح و اللي يزيد الوصفة نجاح و فلاح هو الإخلاص و الإحتساب ،، الإخلاص في أعمالكم لله وحدو من غير رياء و لا نفاق ، و إحتساب الأجر على الله ،  من عندو دون سواه ...معناها  من غير ما تستنّاوْا جزاء و لا شكورا من الخَلقْ ...

و قبلْ ما نكمّل سامحوني ثمّة زوز ملاحظات  نقوللكم عليهم :
~~الملاحظة الأولى : اللّي يحبّ و يقدر يزيد يزيّن الوصفة بشويّة عفو و شويّة فضل و إحسان ،،، طبعا هذا يزيد يحلّي المذاق و يعطينا رونق و نكهة خير للحياة.

~~الملاحظة الثانية : قد ما تجتهدوا باش تطبّقوا الوصفة هاذي قد ما تزيدوا تحبّوها و تحسّوا بأريحيّة ، و تحسّوا بإقبال  ع الحياة و تزيد محبّة النّاس ليكم و هاكا علاش ننصحوا باش يكون تحضيرها بشكل يومي .....

مستمعينا مستمعاتنا ، جعلني الله و إيّاكم ممّن يستمعون القول فيتّبعون أحسنه و دمتم في حفظ الله و رعايته .

//

***  مثلما عوّدتمونا ،، إذا أشكل عليكم لفظ من اللهجة التونسيّة ، راسلونا على أنموذج الرسائل الموجود في الصفحة الرئيسيّة للتوضيح و التدليل ... شكرا 


منجي باكير 

*

ليست هناك تعليقات: