الزّمن الجميل حلقة إذاعية 4 كلمة حلوة Radio sfax

حلقة 4 كلمة حلوّة

 أحبّاء ، متابعي و أوفياء الزّمن الجميل ، يسعدني أن أنقل لكم - في نصّ مكتوب- الحلقة 4 من كلمة حلوة و التي  شاركت بها اليوم الأحد  17نوفمبر 2014 في إذاعة صفاقس - الجمهورية التونسيّة مع برنامج - صباح النّور - للمنشّطة المتألّقة و الرّائعة السيّدة فاطمة مقني قادري ...

صباح النّور و الأمل ليك أختي فاطمة و لكافّة متابعيك ..

اليوم بإذن الله موضوع كلمتنا باش يتناول :

ثـــقافة الإعتذار

هو في الواقع ، كلّ علاقة إنسانيّة عموما تتطلّب ضرورةً التعامل و الإحتكاك عن قرْب و لهذا نشوفوا أنّ هذه العلاقة بين اثنين أو أكثر هي غالبا ما تكون عُرضة للإهتزازات ، ،، علاش ؟ على خاطر حتّى واحد فينا ما هو معصوم  من  الخطأ أو الوقوع فيه إلاّ الرّسل و الأنبياء صلوات ربي و سلامو عليهم ،

 كلّنا و بلا استثناء و من خلال معاملاتنا و سلوكاتنا ممكن باش نغلطو و نخطيو مع الطّرف المقابل سواء بقصْد أو من غير قصد ، بنيّة أو حتّى من غير نيّة ،،، لكـــن القليل منّا هو إللّي ينتبه و يلقى الإهتمام و الوقت باش يراجع نفسو، و يقرّ بغلطتو، و يرجع للحقّ،،، و كذلك أقلّ منهم اللّي يقدر يتغلّب على نفسو الأمّارة و يتملّك بهاء المبادرة  و الجُرأة  على تقديم الإعتذار و طلبان السّماح من الشّخص اللّي آذه أو ظلمو أو خذالو حقّو ،و كـــان ضحيّة غلطتو أو تعدّيه  ،،،

بل حتّى يتغافل على  السّعي إلى واجب جبر الضر الحاصل و مواساتو و الماخذة بخاطرو ...

برشا ناس إمّا كِبْر و تسلّط أو ،،، معاندة أو جهل و مرض نفسي،، يشوفو في الإعتذار إنتهاك لعزّة نفوسهم  و تهبيط لخشمهم  و تطييح للبرستيج متاعهم ، بل يشوفو أنّ الإعتذار خصوصا للّي أقلّ منهم أو أصغر منهم أو مخدوميهم ، يشوفوا الإعتذار إنكسار ، و ما يعرفوش أنّه إذا كان الإعتذار ثقيل على نفوسهم راهو الإساءة اللّي قاموا بيها و الظلم اللّي  عمْلوه أثقل ببرشا على نفوس اللّي ظلموهم و أساؤوليهم ،،،

الأصل في هذا يا سادة هو أنّ الإعتذار فضلا عن أنّه واجب ديني ، هو خصلة ترفّع حضاريّة و قيمة أخلاقيّة سامية و أيضا دلالة واضحة على الثقة بالنّفس ،،

بل الإعتذار هو فنّ ما يتْحلّى بيه إلاّ من آتاه ربّي سبحانو نفس زكيّة ، طيّبة و كريمة ترفض الكِبْر و الغرور و الجحود و التّعالي على خلْق الله ، ،،

و هو مكرُمة لا يتأتّاها إلاّ اللّي ربّى نفسو على قيم روحيّة سامية و التزم بالتعاليم الدينيّة السّمحة و جاهد نفسو أيضا باش يعلّمها كيفاش تذعن للحق و تعترف بالخطأ ،،،

خلاصة كلامنا ،،، الكْبار أي كبار النفوس و الهمّة هوما اللّي يفهموا الإعتذار فهما راقيا ،، وما يراوش حتّى مانع مثلا  باش الزوج يعتذر لزوجتو أو ولدو أو بنتو ،،، و إلاّ باش الرئيس في العمل يعتذر لمرؤوسو ، و إلاّ المربّي يعتذر لمنظورو  و قت اللّزوم ،،،

بالعكس صغار النّفوس و اللّي تأخذهم العزّة بالإثم هوما اللّي يصعب عليهم الإعتذار من النّاس اللّي ظلموهم أو اعتداوا عليهم و يشوفوه استصغار لمراكزهم،،

كما أنّ الإعتذار مطلوب فإنّ  قبول الإعتذار زادة خصلة راقية و سلوك إيجابي يبرهن على صفاء السّريرة ،، ف لازم على من يتقدّم له المعتذر أن يسارع في قبول هذا الإعتذار بعفو و طيبةْ خاطرْ حتّى يكون في  جُملة ْ من مدحهم ربّ العزّة (( و سارعوا إلى مغفرة من ربّكم و جنّة عرضها السموات و الأرض ، أعدّت للمتّقين ، الذين ينفقون في السرّاء و الضرّاء ، و الكاظمين الغيظ ، و العافين عن النّاس ، و الله يحبّ المحسنين )) ، كما أنّ  معلّم الإنسانيّة صلّى الله عليه و سلّم يقول : - وَمَا زَادَ اللَّهُ عَبْدًا بِعَفْوٍ إِلَّا عِزًّا-....

أخيرا همسة صغيّرة  ننّبّهو بيها  بعضنا : ،،،وهي   أنّ الإعتذار هو ثقافة لابدّ للأولياء و المربّين باش يحرصو على تعليمها لأبناءهم و منظوريهم و يلقّنوها للأجيال الصّاعدة حتّى يغرسو فيهم هذه القيمة الحضاريّة و تولّي جزء من تركيبتهم النّفسيّة و الشّخصيّة ..

 اللهمّ إهدنا و أصلح حالنا و ردّنا إلى الحقّ ردّا جميلا ...


 ْ~ْ~ْْ~ْ~ْ

 الحلقة 3 كلمة حلوّة - الزمن الجميل

** ملحوظة : إلى المتابعين الذين يشكل عليهم فهم بعض - الكلمات - باللّهجة التونسية رجاء الإستفسار عن ذلك في التعليقات أو في نموذج الإتّصال ،،، شكرا

---