الزمن الجميل حلقة إذاعية كلمة حلوة Radio sfax

أحبّاء ، متابعي و أوفياء الزّمن الجميل ، يسعدني أن أنقل لكم - في نصّ مكتوب- حلقة شاركت بها اليوم في إذاعة صفاقس - الجمهورية التونسيّة مع برنامج - صباح النّور - للمنشّطة المتألّقة و الرّائعة السيّدة فاطمة مقني قادري ...

~ْ~ْ~ْ~ْ~ْ~
الحلقة بعنوان- كلمة حلوّة 

أهلا أختي فاطمة ، صباح الخير و المحبّة ليك و لكافّة مستمعينك و أوفياء برنامجك ،،، اليوم اخترت موضوع انشاء الله يعجب و يلاقي القبول ...

علاش التونسي نسي البسمة – 

من الثّابت قطعا بالحسابات و الإحصائيات و أيضا بالإجماع الحاصل بين كلّ التّوانسة أنّ تقريبا كلّ المواطنين كبار ْ و صغارْ ، ذكورا و إناثا ، عامّة النّاس و حتّى النّخبة زادة ، أصبحوا على أعصابهم ، علاقاتهم متوتّرة ، كل واحد صبعوا على الزّناد و غير تكلّموا كلمة و إلا ّ تتصرّف معاه تصرّف ما يعجبوش ،

 حدّ ما عاد عندو وسْع بالْ و حدّ ما عاد يعدّيها لصاحبو ، و وصلت ها الحالة السّلبيّة حتّى داخل العايلات فتوتّرت العلاقة بين الرّاجل و المرا  و بين الولد أو البنت و بوهم أو أمّهم ، حــــاصيلوا التّوانسة ضيّعوا الطرافة و وسعْ البال و الضحكة و آخر حاجة فقدوا حتّى البسْمة ، معناها التبسيمة ،، التبسيمة اللّي كانت تزيّن الوجوه و تسهّل المعاملات و تدخّل الفرحة على القلوب و برشا مزايا أخرى ،،،

هاكا النّهار تجْبَد ها الموضوع في قعدة متاع أصحاب ، و بدا كلّ واحد يشخّص و يحلّل و يعطي في الأسباب و المسبّبات ،اللّي قال ما هو من السّتراس اللّي أصبح عليه التونسي من جرّاء الأوضاع السياسيّة و اللّخبطة في المشهد السياسي ، و اللي قال السّبب فيه هو غلاء المعيشة و تدهور المقدرة الشرائيّة و عجز الميزانيّة ، واحد آخر قال من جرّاء سرعة ريتم الحياة ولّى الواحد ما عادش يلقى الوقت للمشاعر و ما عادش يهتم ببرشا تفاصيل و جزئيات و ضاعت البسمة كيما ضاعت في حياتنا برشا جماليّات أخرى ...

أيا كلّ واحد جابو نهجْ و كلّ واحد فسّر الموضوع على حسب رايو إلاّ واحد بركا فينا قعدْ ساكت ، هو واحد ضامر و فدلاك و واخذ الدّنيا ببساطة ،، واحد من الجماعة قالّوا و إنت شنوّا تفسيرك يا صديقنا ، قام قالّو أنا نرى السّبب متاع ضياع البسمة ساهل ياسر و غير اللّي فسّرتوه و حكيتوه ، يا سادة التونسي تربيتو هي ّ اللي نسّاتو و شعّفتو على البسمة بقرار نهائي ، قلنالو كيفاش ؟

قال التونسي كيف يﺘﺒﺴﻢ ﻟﻮﺍﺣﺪ ﻓﻲ ﺍﻟﺸﺎﺭﻉ : يقولّو ﺧﻮﻳﺎ ﺗﻌﺮﻓﻨﻲ ؟؟؟
كيف يﺘﺒﺴﻢ ﻟﺨﻮه : يقولّو ﺷﻨﻮﺓ ﻫﺒﻠﺖ ؟؟؟
كيف يﺘﺒﺴﻢ ﻟﺒﻮه : يقولّو ﺷﻨﻮﺓ ﻋﺎﻣﻞ ﻋﻤﻠﺔ ؟؟؟
كيف يﺘﺒﺴﻢ ﻷﻣّو :تقولّو  ﺷﻨﻮﺓ ﺣﺎﺟﺘﻚ ﺑﻤﺼﺮﻭﻑ ؟؟؟
و كيف يﺗﺘﺒﺴﻢ ﻓﻲ ﺍﻟﻘﺴﻢ : الأستاذ و إلا المعلّم يقولّوﻫﺰ ﺩﺑﺸﻚ ﻭ ﺍﺧﺮﺝ.

إيه عاد منين مازال يعرف التّبسيمة ؟؟؟ماهو تضيع من قاموس معاملاتو مرّة وحدة !

منجي بــــاكير 

الزمن الجميل : يقظة فكر ، دعوة لإحياء روح الزّمن الجميل و إعمال العقل لبناء الحاضر

*