إجمع حبّات الفرح لتصنع عناقيد السّعادة ح 45 إذاعة صفاقس

مستمعينا الأكارم ، أهلا و سهلا ،،،، مرحبا بيكم في موعد آخر  ،، مع كلمتنا و اللي باش يكون موضوعها  اليوم تحفيز على التفاؤل ..وعنوانها : 

جمّع حبّات الفرح لتصنع عناقيد السّعادة

في الواقع أحنا التّوانسة حياتنا مليانة بالضغوطات ، بالقلق و السّتراسْ ،،، شيء من الظروف و الملابسات.. اللي تأثّث حياتنا خُلْقي ، و شيء نعملوه وحّدنا و ساعات نشريوه بالفلوس ،،،  و علماء الطبّ النّفسي يقولوا أنّ الإنسان وقت اللي تهاجمو ها الضغوطات بوتيرة كبيرة ، فإنّ داخل الإنسان يستجيبلها ، و يتفاعل معاها باش يتغلّب عليها و يتجاوزها ....و بالتالي هو يستعمل في طاقة ، ها الطاقة المستعملة.. إذا ما تحيّنتش وما صارش تجديدها  يجيها وقت تتعب و  تعْيا، ويمكن أحيانا توصل بها الإنسان إلى حافّة الإنهيارالنّفسي أوحتّى الإنتحارعافاكم الله...

واحنا في كلمتنا اليوم  مستمعي الكريم باش نحكيوا على كيفيّة التحين و التجديد لْهذي الطاقة ،، وحديثنا باش يدور و يتمحور حول جملة  : ( جمّع  حبّات الفرح باش تصنع عناقيد السّعادة ) آش معناها هالكلام ؟؟ معناها أنّك  في حياتك ما تحقر حتّى حادثة صغيرة فرّحتك ، و دخّلت لقليبك السرور ،،  مهما كانت صغيرة ، حتّى مجرّد ..كلمة حلوّة ، شكر و إستحسان ، دعوة لطيفة من صديق على قهوة ، تاليفون من شخص عزيز عليك ..يسأل و يوشحلْ ، أو عدد باهي لواحد من صغارك في قرايتو ....

هاالحويجات الصغار ،،، هالحبّات الصغيّرة متاع الإنشراح و الفرح ،،، حاول تربطهم ببعضهم و تسجّلهم في عقلك الباطن حتّى يكوّنوا عنيقد متاع  سعادة ....و ركّز كلّ مرّة باش تبني كل يوم جديد على ها الحوايج الباهية ....و إذا اعترضتك حوايج أخرى سلبية ...انساها  ، تجاهلها ،، و ما تركّزش عليها ، بل ارفض تسجيلها في عقلك الباطن ....و استحضر قدام عينك و في تفكيرك النقاط الايجابيّة و الحاجات الباهية ....

أما إذا كثرت عليك السلبيات و الهموم و المشاكل و تسكّرت ،، أعمل كيف جهاز الكميوتر ،الأورديناتير ،، الأورديناتير وقت اللّي  يكثر عليه الضغط ، و تتشربك أمورو... طبعا ( يتبلنتا ) و إذا إنت حبّيت  تعاود تخدّموا  ،، يعطيك آليّا ثلاثة إقتراحات كيفاش يديمارّي من جديد ، واحدة منهم ...أنو يقترح عليك – الإنطلاق --------)DERNIERE BONNE CONFIGURATIONمن آخرتحديث جيّد (

وكيف كيف  أنت عزيزي المستمع إذا ضاقت عليك الدنيا  و استحكمت دوائرها ،،، إرجع ، إرجع لْآخر نقطة فرح ، لْآخر حدث و إلاّ حادثة أدخلت على نفسك البهجة و السّرور و عاود إبني عليها من جديد....

 كذلك ....حاول باش ما تعاشرش و ما تحيطش بيك ناس سوداويين على خاطر ما يزرعوا فيك كان الإحباط و اليأس ،،، و الأحسن و لْخير من هذا ....أنك ما تربطش نفسك بأفراد و بأشخاص... و ما تبنيش حياتك على أشخاص ....بل ابنيها على أهداف ،،، على خاطر الأشخاص يمكن يتغيّروا ويتبدّلوا و يمكن  يمشيوا و يبعدوا ....أما الأهداف المرسومة صحّ... تبقى ثابتة ، ،،،  تعينك و تحفّزك ديما ..

حاجة أخرى هامّة و هامّة برشا و للأسف ما نعطيوهاش بالنا ،،، و هي اللغة ، سواء اللغة اللي نتواصلوا بيها مع غيرنا أو حتّى اللي نستعملوها في حوارنا الباطني ، بينا و بين أنفسنا ، اللغة هذي لازم تكون لغة فاتحة موش غامقة ، حلوّة موش كاسحة أو رزينة و معناها ...كيف نعبّروا ....نحاولوا باش نلقاوا مترادفات أقلّ تأثير سلبي على النّفس ....و نحاولوا ديما نوجدوا في حواراتنا ألفاظ إيجابية أكثر من الألفاظ السلبيّة ،،،،،

مثلا... المرّ يجي نهار و يولّي حلو ، الأسود يمكن يولّي أبيض ،،، المستحيل قد يكون عندو نقطة تلاقي مع الممكن ،،  الألم عندو وقت و يزول،،  مادام ثمّة حياة ثمّة أمل .....

كيف كيف نحاولوا نحسنوا الظنّ بالآخر و نعطيوا ترجمة إيجابيّة لكلامو و تصرّفاتو ، طبعا ...حتّى يثبت العكس ....

وما ننساوش باش نشحنوا أنفسنا ، خصوصا مع بدايات النّهار  ، بالكلام الإيجابي ، الكلام اللي يحفّز ، الكلام اللي يطمّن النّفس و يسمو بالمشاعر ....وأحسن كلام ما يكون كان كلام ربي سبحانو ،،،، و أحسن نصيحة نقولهالكم عليكم بالقرآن  و توّا تلاحظوا برشا تغيرات في حياتكم ....

مستمعينا الله  ينوّرنا  و يصلح حالنا  ....و إلى لقاء آخر إن شاء الله