القهوة التونسيّة ح 47 إذاعة صفاقس Tunisian coffee

مستمعينا أهلا و سهلا بيكم ،، صباحكم صباح قهيوة عربي ، مزهّرة و فوّاحة ،، اليوما كلمتنا باش تحكي ع

 القهـــوة

آشكون منّا ما يحبّش القهوة ،،،القهوة مرسول الأنس و الإنشراح ،،،، لكن كذلك القهوة فيها أنواع و عندها معاني ، و في بلادنا العزيزة و مع شعبنا الكريم القهوة عندها  زاده  مشتقّاتها و عندها مفاهيم و تعريفات  أخرى ،،و من جملتها ثمّة : القهوة ،،،، و ثمّة  قهوتك ،،،، وثمّة  قهوتي ...

هات  السّاعة نبداو بالقهوة ،،، القهوة ، بمعنى المقهى – المقاهي أو  القهاوي  ولاّت معبّية بيهم البلاد ، في كل شارع و في كلّ حيّ وفي كلّ زنقة ،، ما بين القهوة و القهوة ثمّة قهوة قاعدة تحضرْ ،،على خاطر القهاوي ولّى ربحهم ياسر ،و دولابهم ماشي ،،  خصوصا أنّ كليوناتها  أكثرهم اللي يجي باش يعمل قهيوة يولّي  يبني فيها دار مقام ،، شيء من القلق.. و شيء من البطالة... و شيء من الهمْلة ..و زادة للهروب من تقرقير المرا و دوشة  الصّغار ،،،، قولْ هو كي تجي تارى أحْنا ما بعدناش على معنى القهوة في قواميس اللغة ،،، قالّك يا سيدي  في العربيّة : القهوة اشتقاقها من الإقهاء ، و الإقهاء معناه الإقعاد ، مِن أقهى الرّجلُ عن الشيء أي قعد عنه و كرهه ،،، و احنا بما أنّا عربْ أقحاح ترجمناها بكلّ أمانة أدبيّة  إلى ...اللي يدخل القهوة يقعد و يبنّك غادي و يكره ما سواها ،،،و خصوصا كيف يكون فيها طريحات رامي و إلاّ بيلوط . ..وزيد كان  صاحب القهوة يكون كريم ...يحلّ لكليوناتو (الويفي) و قتها عادْ تولّي ( محْلى القعدة ع القهوة محلى الربيع ....ومحْـلى القهوة التونسيّة تضمّ الجميع ) .

إيه نعم ، تضمّ الجميع ، خصوصا القهاوي المنتصبة قصْدا بحذا المدارس و المعاهد ، تضمّ التلامذة و البزناسة – طبعا  هذي موش مشتقّة من كلمة بزنسْ- وثمّة  أيضا اللي يخترقوها  المنحرفين باش يزرعوا فيها الموبقات بأنواعها و أشكالها و يعطيوا للتلامذة دروس تكميليّة ،، و زغرطي يا محاسن ....

توّا نجيوا ل ـ كلمة ((قهوتك )) ،،، ها الكلمة جامعة ، دالّة وافية ،، يستعملوها  بعض التوانسة على مختلف مستوياتهم ،،،باش يترجموا بيها كلمة (( رشوة )) ، كلمة ( قهوتك) هي فتوى شيطانيّة يستحلّ بيها بعض الناس القوانين و التشريعات ، و باش يعدّيوا الممنوعات ،، و باش  ياخذوا حق موش متاعهم و إلاّ يحوزوا على امتيازات : مثلا ، كيف ما ، ما يشدّوش الصفّ ،،، ما يحترموش نواميس الإدارة ، و القوانين ما تشملهمش  ،،، تجيهم قضياتهم واصلة فوقْ أعناق الغلابى  ... و غيرها من التعدّيات ...و التجنّيات اللي تغطّيها  كلمة ( خوذ قهوتك ) و إلاّ ..نعطيك قهوتك...

أمّـــــا كلمة  (( قهوتي )) وإلاّ  نعمل قهوتي ،،، فهذه كلمة حقّ يُراد بيها باطل عند موظّفينا في القطاع العامّ ،، أمّا في القطاع الخاصّ فلا وجود لها ،،،،

- نعمل قهوتي توّا نْجي - هي عبارة دارجة في إداراتنا و مؤسّساتنا العموميّة و مستعملة برشا ،،، تلقى ثمّة البعض  من معشر الموظفين و الموظّفات آشكون  يوظّف ها الكلمة باش يخرج  أثناء توقيت العمل ...و إلا حتّى قبل ما يبْدا العمل أصلاً .. خصوصا مللّي زاد سْياب الماء ع البطّيخ ،،، لا ، وزيد نعمل ْ قهوتي ولاّت حقّ مكتسب و يا ويح المواطن وقت اللي  يعترض أو يحتجّ على تعطّيل مصلحتو ،،، لكن .... يقعد من حقّو  باش يردّد في صدرو  سرّا  ( اصبر يا بو قهْرة ،،، حتّي يجيك فلان و إلاّ فلانة من القهوة )  

للّي ما يعرفش ثمّة مؤسّسة عموميّة ،، داير بيها 13 قهوة – و الإحصائيّة قديمة شويّا موش محيّنة – و تصوّروا يا سادة ..كان على مدار سوايع العمل  كلّ قهوة  منهم فيها معدّلا 30 واحد برْكا  ( 30 واحد ماركة نعمل قهوتي ) و قهوتي .. بالتوقيت المريح ...توّا تعرفوا حجم المصالح المعطّلة ..و تعرفوا حجم الشهريات الضّايعة ....

و غيرها  طبعا برشا ،،،و كي تحاول تحكي مع واحد من جماعة نعمل قهوتي ، يقولّك كنت نعمل في قهوتي ،، فيها شيء ؟ لا..ما فيها شيء ..كيما قال كاضم السّاهر ..

هكّا مستمعينا الاكارم نكونوا  قدْ وصلنا للتّنوة .... و سامحوني كان القهوة جات مرّة شويّا ... لكن للاسف هاكا هو واقعنا ...

تحيّاتي و بعضا من أشواقي 

 ~~~~~  منجي بـــاكير ~~~~

***  الموضوع باللّهجة التونسيّة 

 كلّ لفظة أشكلت على أحبّاء الزمن الجميل 

 فضلا راسلونا

على نموذج الإتّصال الموجود

في الصفحة الرئيسيّة 

تقديري 

--