بكّر كول السّفنج حلقة 08إذاعيّة

كــــالعاة أحبّتي متابعي الزّمن الجميل ، يسعدني أن أنقل لكم الحلقة الإذاعيّة 08 من كلمة حلوة في برنامج صباح النّور للمنشطة المتألّقة فاطمة مقني قادري و التي أُذعيت اليوم الأحد 15 ديسمبر 2013 على أمواج إذاعة صفاقس - الجمهورية التونسيّة ...

لكلّ من أشكل عليه فهم لفظ من اللهجة التونسية الإتصال بنا على نموذج الإتصال بالمدونة للتفسير و التوضيح ،، شكرا 

ْ~ْ~ْ~ْ~

نهاركم زين و صباحكم ورْد أختي فاطمة ...إنت و مستمعينك                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                 

في الحقيقة من بعض العادات اللّي ماهياش باهية و تزرعت فينا ،عادة السّهريات إلى وقت متأخّر من الليل .. و بالتّالي يكون  القومان موخّر،، ، سهريات في أكثرها ، قلت في أكثرها على هداري فارغة – طبعا بخلاف اللّي اقتضات منّو  خدمتو هذا الفعل –

ها السّهريات ما ينتج عليها و ما  تورّث كان السلبيات ، منها اختلال التوازن                                                                                                البيولوجي في الإنسان ،،، لأنّ ربّي سبحانو خلقّـنا ساعة بيولوجيّة تحدّد تصرّفات أجهزة الإنسان... بوقت و مقدار و عليها  تكون فاعليّة  عملها و أداءها ،و لهذا كان النهار للعمل و النّشاط ....و الليل للرّاحة و السّكينة ، كذلك الإنسان عندو سويعات معدودة للنّوم في اللّيل.. باش البدن يرتاح و يعاود من غدوة نشاطو و حيويّته ..

 وباش يتخلقْ  النّشاط و الحيويّة  في الإنسان من جديد ،

مطلوب صحّيا أنّه نرقدوا بكري و  نقوموا بكْري .

و القومان بكري فيه برشا منافع منها أداء الفرض في وقتو ،الإستفتاح و التوجّه للخالق و مناجاتو وطلبان الرّزق، و هاكا علاش نلقاو في أمثالنا الشعبيّة ، أمثال الزمن الجميل كيف ما مَثَل ( بكّر كول السّفنج ) و إلاّ (اصبحْ و اربح )

كذلك القومان بكري يساعدنا على استقبال نسمات الفجر و كلّنا نعرفوا احتياجنا ليها  و منفعتها ، الإفطار في رويّة ، القيام ببعض الأنشطة الرياضيّة ، يساعدنا زادة في التركيز و جدولة أعمالنا اليوميّة و تنظيمها ..نذكر أنّ الإخصّائيين في التنمية البشريّة يسمّيوا ها السّاعة ، ساعة القومان بكري – ساعة التركيز و الإبتكار – على خاطر تمتاز بصفاء الذّهن ...

القومان بكري زادة يساعدنا على الوصول للعمل بلاش زرْبة  و بأقلّ ضوضاء و بعيد على  التأزّم المروري و بأقلّ نرْفزة و سْتراس ،،،

الثّابت أيضا أنّ النّاس اللّي تقوم بكري يكون مزاجها طول النّهار رايق و أكثر تفاؤل و أقلّ ردّات فعل اعتباطيّة،،، و كذلك أكثر و أجود إنتاج في العمل ...

نكمّل نختم حديثي بطرفة صغيّرة ،،،

ثمّة معلم حبّ يشرح للتلامذة متاعو فوائد النهوض باكرا

وما يعطيه للجسم من قوة ونشاط . وضرب مثلاً بالعصافير والدود.... فالعصفورالذى يخرج مبكراً هو الذى يأكل الدودة ،،، وبعد الدّرس  طلب المعلم من أحد التلامذة المعروفين بكسلهم     باش يذكرْلو آش فهم  من الشرح فأجاب التلميذ : الدودة التى تخرج باكراً تأكلها العصافير....

آه ، نسيت باش نقول لكم أنّ من فوائد القومان بكري زادة ،،، خصوصا أيّام  الأحد متابعة صباح النّور ،،، مع المنشّطة النّشيطة فاطمة مقني  و ما تأثّث بيه برنامجها من موسيقى و ألحان سمحة و حديث شيّق و مداخلات هامّة ،،،و إفادة متجدّدة في كثير من مناحي حياتنا ...

ربّي يهدينا لما فيه الخير و الصّلاح .

---