أنت إنسان رائع ح إذاعية 18 Radio Sfax

أحبّتنا، قرّاء  و متابعي الزمن الجميل أهلا بكم في حلقة 18( نصّية ) من كلمة حلوّة و التي أذيعت اليوم  الأحد 31أوت 2014 على أمواج إذاعة صفاقس بالجمهورية التونسيّة ، خلال برنامج صباح النّور للإذاعية الرّائعة فاطمة مقني ..
. 

-*- ملحوظة : كلّ من أشكل عليه فهم ما ورد في النّصّ من اللّهجة التونسيّة ، فضلا مراسلتنا على أنموذج الرسائل الموجود ببوّابة المدونة ~~~  شكرا 
~~~~~

مستمعينا الرّائعين  ، نهاركم زين ،،أهلا و سهْلا بيكم من جديد في كلمة حلوّة :

أنت إنسان رائع!!   

طبعا كلّ إنسان سويّ يحب يعيش ...في بيئة و حالة بسيكو -  إجتماعيّة متوازنة

هذا مافيهش شكّ و لا إختلاف ... و باش يتحقّق هذا التّوازن ، لازم ها الإنسان السويّ يكون عندو هو زاده تفكير إيجابي،،  و عندو سلوك إيجابي تُجاه نفسو أوّلا و تُجاه المجتمع اللّي يعيش فيه ،،،،

و التّفكير الإيجابي و السّلو ك الباهي و الفعّال ، مولاه ما يستاهل من المجموعة  اللّي يتعايشْ معاها  كان العرفان و الشكر ،  و يستاهل بكلّ جدارة باش يتقالّو : ...  أنت إنسان رائع !

عبارة ((أنت رائع )) تزيد و تنمّي الشعور الطيّب في النّفس و تزرع فيها الأمل و تحفّزالإنسان  للإقبال على الحياة و المزيد من البذل و العطاء ،، و المزيد من الإيجابيّة ...

في الحقيقة - ((أنت رائع )) أكثر الأحيانْ ما تتطلّبش منّا برشا مجهودْ ،،، ما تتطلّب كان شويّا - إيمان ،،، شويّا إرادة ،،، و شويّا فعل إيجابي ،،،،

         فمثلا :

-  وقت اللّي تسارع في السؤال عن أحوال آش كون يغيب عليك ... فأنت رائع

-  وقت اللّي ما تتردّدش في مدّ يد المساعدة للآخرين في أفراحهم و أحزانهم  و توقف إلى جانبهم   لله في سبيل الله  ... فأنت  إنسان رائع !

-  وقت  ما تتسرّعش  في الحكم على الآخرين من خلال ما تسمع عليهم   من الغير   فأنت أيضا رائع !

-  وقت اللّي  تحفظ أعراض الآخرين ، و تمسك عن الخوْض فيها  . فأنت رائع

-  وقت اللّي  ما تتحدّثش بكلّ ما تسمع ، و ما تتحدّثشْ  في الشّان اللّي ما تعرفوش فأنت رائع جدّا .

-  و زادة وقت اللّي تكون طيّب السريرة ، ضحكتك على وجهك و تقابل السيّئة بالحسنة  و توسّع بالك فأنت رائع ..

-  وقت اللّي  تحافظ  على نظافة  المكان اللّي تتواجد فيه و تحرص على ذلك كيف ما حرصك على نظافة نفسك --  ونظافة دارك فأنت رائع ..

-  وقت اللّي تحترم دورك في الصفّ و تحترم الأنظمة المعمول بيها  لتسهيل الخدمات  فأنت إنسان رائع ..

-  وقت اللّي تحترم قواعد المرور : تاقف في الضوء الأحمر و ما تاخذش أولويّة غيرك ....و خصوصا ، خصوصا ما تاقفش في الضوء 3- ( تروازيام ) و 4 كاتريام بوزيسيون – فأنت أيضا إنسان رائع و رائع برشا ......و قليل وجودك أيضا ...

-  وقت اللّي تخلّي جانب من حياتك خصوصي جدّا و ما تحطّش  من نفسك حكاية على كلّ لسان ، و الّي يجي يعطي رايو و يحشي مناخرو في حياتك الخاصّة ،، فأنت إنسان رائع ..!

- وكذلك وقت اللّي تمتاز بضمير صادق ...  يراعي ربّي و يخاف الله في السرّ و العلن ،،، فأنت إنسان رائع و رااائع جدّا ..

إن شاء الله نكونوا الكلّنا نبحثوا على التميّز ، و الكلّنا نلوّجوا على الرّوعة و نساهموا في إيجادها في حياتنا و نساهموا في زرعها ،،،، و كل يوم مستمعينا الأفاضل أنتم رائعون !!

 منجي بـــــــاكير

***