صورة كاريكاتوريّة للمرأة التونسيّة ح إذاعيّة 13

 

ح إذاعية 13  صورة كاريكاتوريّة للمرأة التونسيّة

في تواصل مع الحلقات الإذاعيّة لكلمة حلوّة للمنجي باكير في برنامج صباح النّور لصاحبته فاطنة مقني – إذاعة صفاقس / الجمهورية التونسيّة -،، الزّمن الجميل يسعده أن ينقل لكم الحلقة 13 مكتوبة باللّهجة التونسيّة ( صورة كاريكاتوريّة للمرأة التونسيّة )، فضلا كلّ من أشكل عليه فهم أيّ لفظ منها مراسلة الزمن الجميل على أنموذج الإتصال الموجود في الصفحة الرئيسيّة ،،

مستمعينا الأفاضل و مستمعاتنا الفضليات يجعل نهاركم زين و خير و بركة ، أهلا بيكم في موضوع جديد من كليمة حلوّة .... هو في الحقيقة المرا في حياتنا هي الجمالية و البسمة اللّي منحها لينا ربّي سبحانو باش تأثّث حياتنا و تزيّنها ....و اللّي باش نحكيوه اليوم ما هو إلاّ فرفشةصغيّرة في قالب صورة كاريكاتوريّة على المرا لا أكثر و لا أقلّ ...

أحْنا تحدّثنا مرّة سابقة -في صورة كاريكاتوريّة- على الراجل التونسي ، اليوما إن شاء الله و عملا بمبدإ التكافؤ و التناصف و الفِيفتي فِيفتي  اللّي أقرّو دستورنا و اللّي تحمّسولوا الرّجال قبلْ النّساء ،باش نحكيوا اليُوما  زاده على المرا التونسيّة ،  المرا اللّي من عهد بورقيبة و هي قالّك تنعم بالمكاسب اللّي ما تحصّلت عليها حتّى مرا أخرى سابقا و لا لاحقا ، مكاسب هي قاعدة ... و زهرهــا يجري عليها هي قاعدة و الجماعة يفكّرولها و يستنبطولها و يقرّرولها زادة -- برغم اللّي هوما يقولوا أنّ المرا ما هياش قاصر- ...مكاسب هانا نحصدوا في نتايجها على مستوى الأسرة و المجتمع عربيا و عالميّا ، بحيث واخذين صدارة المراكزبلا منافس  ..

مـــا عليناش ،، نرجعوا لْموضوعنا اليوم ، المرا التّونسيّة ، المرا التونسيّة عموما و بعيد ع الإستثناءات ...مرا مناضلة و مجاهدة تستاهل كل خير و شكر ،،

لكــــــــــن هذا ما يمنعش باش نشوفوا حالها  و وضعها  عن قرْب ،،،

أوّلا أختنا المرا التونسيّة تلقاها ديما كيف الطقس ها الأيام : في الصّباح شتاء و نصف النهار ربيع و العشيّة خريف ، معناها كلّ ساعة وعلمها ،،

ثانيا هي تحاول باش توفّق بين الأصالة و التفتّح و لكن أكثر الأحيان تفسّدها ، مثلا تحبّ تتحجّب أو تدّين كيما يقولوا برشا توانسة ، تلبس تقريطة و تفصّلها على كيفها و الباقي ما يهمّش – و  من غير ما ندخلوا في التفاصيل ،،

زيد حاجة ...، كيف تسألها مثلا علاش إنت متحجّبة و بنتك الصّبيّة لا ، تقولّك ....مازالت صغيرة ، حتّى تشوف حياتها ...!

و الحجاب  أيضا عند التونسيّة عندو برشا مزايا أخرى ربّما أهمّها أنّها ما تضيعش فلوسها و وقتها عند الحجّامات في وقت الأعراس و المناسبات  ،،،

توّا خلينا نصنّفوا المرا على حسب وضعياتها ، أولا عند نا العازبات و هنّ العوانس و الأوانس هاذوما باش نتعادّاوهم  نقولولْهم ربي يجيبلكم المكتوب و يقوّي سعودكم ..

ثانيا المرا ال ( نون كلاسّي ) و نقصدوا بيها المرا ربّة البيْت و بس و هاذي المرا اللّي محسوبة ع القعدة في الدّار و ما فيها من غْبينة ، غبينة  ظاهرا لكن اللّي نشوفوه فعلا أنّها غالبا تضرب ضربة و تجي في قاع الحانوت ، معناها هي محسوبة ع الدّار لكن وين تمشي تلقاها ،،، تلقاها في الرّوضة ، في كل أوقات المدارس ، في الستاغ ، في المرشي و.. في حْلُقْ الفريب ،،،و الأغرب من هذا أنّها ديما عندها آخر أخبار المسلسلات و البرامج التلفزيّة و الإذاعيّة ،،

و ها النوع من النّساء هوما اللّي ديما لبستهم شيك و عيشتهم شيك و آخر موضة .!

ثالثا  المرا التونسيّة 2 اونْ 1  و معناها ربة منزل وتخدم البرّة ،، و هاذي مسيكنة تعاني .. و في الشقاء تعوم ، تجري ما تلحق ، من الصباح تبدا رحلة التّعب  ،،

و زيد محرومة و ما تلحّقش روحها ...و يا دوب تظهر في( الإكران) وقت الّلمّات و المناسبات ،،، على خاطر الوقت يجري عندها ديما ،،،و حاجاتها الكلّ بالزّربة و ما يخرجوش ( بْيان فيني ) و غالبا موخّرة بساعة ،،،

و زيد حاجة ......، في الماكلة مثلا صغارها تعلّمهم من الأوّل و تسنّسهم   بالروتي و البيتزات واللُّمجْ على خاطر غالبا الفضا ماثمّاش ... و بعد كي تحكي تلقاها تستغرب و تقول لك صغاري ما يحبّوش النعمة : كيما الكسكسي و المغلّي و غيروا ....و تنسى  اللّي هي السّبب... و صغيرك على ما تربّيه ..!  **

 و بما أنّو كلّ حاجة فيها استثناء ،، المرا العاملة واللّي  تكون مهفّة و تعرف كيفاش تخرج منها  ،، تولّي في الدّار تعيّط و تشكي من الخدمة ،،،راهي ياسر—

 و كيف تجي للخدمة تولّي تشكي من الحرْكة متاع الدّار ياسر.... و هي في الحالتين مسلّكتها و تضرب في التكركير ،،،

نجيوا أخير للمرا ال3( أونْ 1) و هاذي معناها المرا لمّا تكون ربة بيت و تخدم و زيد عندها أنشطة جمعيّاتيّة و إلاّ إلتزامات حركيّة و حزبيّة ! هاذي عاد تتسمّا ( معجزة النّسوان ) كيفاش باش توفّق بين ال3 واجهات ..و كيفاش تلقى روحها ،، في الحقيقة الجواب الصّحيح و الرّسمي و سرّ المهنة كيما يقولوا ما تعرفوا كان هي ّ ،كذلك  تداعياتو بأنواعها ما يحسّوها كان عايلتها و خلّيها بالسّترة و ربّي يعين ..

**

ختاما نقولوا اللّي حكيناه و قلناه ما هو إلاّ تفرفيشة صغيرة و صورة كاريكاتوريّة باش نّفسوا على أرواحنا و سط التجاذبات و السّتراس الحاصل.

 من الحراك اللّي صاير في البلاد ،، و يبقاوْ التوانسة رجال و نسا طيبين وطيّبات ، و  إن شاء الله الجايات خير من الرّايحات، و إن شاء الله تمشي الأمور على خير و نشوفوا تونس في أحسن حال ..

 صورة كاريكاتوريّة للرجل التونسي اليوم 

//