10 حلقة 30إذاعية 10 حال و أحوال
مستمعينا و متابعينا ، صباح النور والمحبّة و
الجمال ،، الله يصبّحكم ديما في أحسن مقام
و على أحسن حال ... موضوعنا اليوما باش
يكون في شكل إضاءات تعتمد على عبارة موجودة في حواراتنا و نستعملوها أحيانا ،،، و هي :
حال أحوال و أمر يدوّخ
عبارة أو جملة (حال
و أحوال و أمر يدوّخ) هي عبارة دارجة في لغتنا الشّعبيّة التونسيّة
و ها العبارة تظهر أو تتقال خصوصا في حالة
ماناش راضين بحاجة او بشيء ماكانش في حساباتنا ،،، و يدلّ معناها على الأسف ...و الأسف الشديد
....و الأمور ولاّت ماهياش باهية بالكلّ ...
و ها العبارة تتقال أحيانا مفرّقة ومقسّمة ،،
فناجدو مثلا يا والله حال ،،، و هي أقل الدرجات من الأسف ،، درجة نقولوا صفراء
اللّون ،،، ثم تجي بعدها يا والله حال و أحوال ،، و هذي تتقال وقت اللّي
وقع وصار عندو أهميّة أكبر و هي درجة ثانية و لونها برتقالي ،،،
و إلاّ تتقال كاملة ، فيتْقال يا والله حال و أحوال و أمر يدوّخ ،،، هاذي عاد
أعلى درجات التأهّب و أكبر درجات الإستنفار النّفسي و العقلي و لونها طبعا أحمر !
و معناها الأمور صارت ما تعجبش و ماهياش باهية
بالكلّ ...
*
نقولوا مثلا يا والله حال للّي ما عندوش قناعة
ثابتة في حياتو و ما عندوش مبدأ صحيح يعيش عليه ،،، و نقولوا يا والله أحوال وقت
شخص يكون متذبذب و يملكش قرار مستقلّ و ما
عندوش راي شخصي ،،، أما وقت اللي ها الشخص يصير من نوع ميحي مع الأرياح ....كيف
ذيل السّردوك ، ويصبح إنتهازي وهو مع الواقف اليوم .... يوصل يبدّل كلامو و رايو .....وحتّى
اللّوك متاعو حسب اللّي
ظاهر و طالع ...فهذا تولّي أمُورو يصحّ عليها : حال و أحوال و أمر يدوّخ ...!
*
يا والله حال و قت اللّي مثلا ، ربّ العايلة ...البو
يعْني ، يسلّم في صغارو.. و يعمل ما عالابالوشْ ،،،،،، ديما عندو ما شاغلو في القهوة و مع الأصحاب و
مسيّب الماء ع البطّيخ ،،،،و يا والله أحوال وقت الأمّ زادة ضايعة فيها و يكثر
عليها الحْمِل و تعود موش قادرة توفّق بين
الدّار و الخدمة ،،،أمـــا وقت اللي تولّي الدّار جحيم لا يُطاق و يكثر العرْك و
الصياح و هاكْ الصغيّرات يهجّوا من الدّار و يضيع دليلهم فوقتها يولّي عـــادْ أمر يدوّخ ...
*
يا والله حال تتقال زادة وقت اللّي تلامذتنا
يسيّبوا قرايتهم ، يتلاهّاو أكثر بحوايج اخرى و القراية تكون آخر إهتماماتهم ،،،،
و يا والله أحوال وقت تكون السياسة التعليميّة متاعنا متخلّفة و البرامج و
المقرّرات فارغة ،،، لكن إذا نسبة معتبرة
من التلاميذ و التلميذات في غياب
الرقابة و المتابعة يولّيوا مستهلكين
بامتياز للدخّان و المخدّرات و غيرها من الموبقات فهذا أمر يدوّخ !!
*
و في نفس السّياق ، يا والله حال وقت اللّي
البرامج التعليميّة برشا و الفايدة ربّي يجيبها ،،، أما وقت اللي الإيتيد و الدروس
الخصوصيّة تولّي أهم ّ و أبجل من الحصص الرسميّة فهذا نقولوا عليه حال و أحوال ،،،
خلّي عاد كان بعض المربّين يلزّموا الإيتيد و تولّي بونتوات و تجميدات للّي ما
يقراش الإيتيد ، تولّي وقتها أمور متاع
لهفان فلوس و تولّي زادة حال و أحوال و أمر يدوّخ ....
*
يا والله حال وقت مريض يعلم ربّي بحالو يمشي
للسبيطار باش يعمل سكانار لازم و أكيد للتشخيص يضربوه بموعد ستّة شهور ،،، و يا
والله أحوال وقت اللي يعدّي هاك الشهورة و هو مريض و يمكن تتعكّر حالتو و يصير فيه
ما يصير و نهار الموعد بعد ما يضرب 50 أو 60كيلوماتر يلقى السّكانار معدوم ،،، لكــــــن زادة وقت اللّي يزيد يعْطِيوَه رنديفو ثاني و يلقاه بعد 06 شهر يولّي عاد حال و
أحوال و أمريدوّخ بالحقّ ..!
*
يا والله حال كيف صفاقس يسلّموا فيها أهلها و
يهجروها أبناءها ،،، و يا والله أحوال كيف تضيع صورة صفاقس الباهية و الحلوّة وسط
فوضى الإنتصاب و عشوائيّة البناء ،،، أمّا وقت اللّي تولّي صفاقس تعوم و تغطس في
الزّبلة و تبات و تصبح في الرّوايح الكريهة و سحب دخّان الحرقان فهذا أمر يدوّخ ...
لكن اللّي يوجع أكثر .... وقت اللي تصبح صفاقس
محطّة إنتخابيّة ،، كلّ واحد يجي يعبّينا بشبعة بيانات إنتخابيّة ، و برشا وعود
وهميّة و بعدين يمشي بخيطو يا اللّي ريتو فهذا عاد يتقالّو حال و أحوال و أمر يدوّخ بحقّ و حقيقي
....
*
*
وباش نختموا .... نقولوا ، ياوالله ....حال وقت الحملة الإنتخابية الرئاسيّة
تكون خالية من البرامج و ما تعتمد كان على التعصّب لأشخاص و أسماء ،،، و زادة إذا تولّي لغة ها الحملة معبّية حقد و خصام و
عراك فهذا أمر يدوّخ ،،، لكـــــن إذا
الخطاب ، الخطاب السياسي للحملة ينتج عليه تقسيمات للشعب و تصنيفات الأصل فيها مرفوضة .....فهذا عاد يقولو حال
و أحوال و أمر يدوّخ .....
-*-
ملحوظة : كلّ من أشكل عليه فهم ما ورد في النّصّ من اللّهجة التونسيّة ،
فضلا مراسلتنا على أنموذج الرسائل الموجود ببوّابة المدونة ~~~ شكرا
ليست هناك تعليقات:
إرسال تعليق